Erika Anne Hayfield, sum er granskari á Fróðskaparsetri Føroya, sóknast eftir fólkum, sum hava hug at taka lut í einari granskingarverkætlan um, hvussu henda tíðin við korona ávirkar gerandislívið.

Korona hevur havt ógvusliga ávirkan bæði á okkum í Føroyum og um allan heimin. Hetta er sostatt ein heilt serlig tíð, vit liva í, har óvissa valdar, og gerandisdagurin hjá fólki er grundleggjandi øðrvísi, enn hann var. Støðan broytist alla tíðina, og tí er tað áhugavert og umráðandi at fáa til vega vitan um, hvussu henda tíðin ávirkar okkum í Føroyum dag fyri dag, skrivar Erika Anna Hayfield. 

Hon sóknast eftir umleið 50 fólkum at skriva dagbók einar 2-3 ferðir um vikuna (ella oftari) í ein til tveir mánaðir fram. Erika er eisini áhugað í at hoyra frá tær, um tú longu ert farin í holt við eina dagbók. Ynski er at hava fólk í ymiskum aldursbólkum. Alt tilfar verður viðgjørt í strangasta trúnaði, og granskarin hevur verið í samráð við Dátueftirlitið um, hvussu lógir og reglur um persónsupplýsingar verða fylgdar.

Av tí at verkætlanin fer í gongd beinanvegin, er umráðandi, at fólk seta seg í samband við Eriku Hayfield sum skjótast og ert tú undir 18 ár, er neyðugt, at foreldur tíni geva samtykki til, at tú tekur lut.

Vegleiðing og samtykkisváttan fáast við at skriva til Eriku antin við privatboðum á Facebook ella á erikah@setur.fo.