Bara hetta síðsta døgnið eru tíggju skrásett afturat, sum eru deyð á hesum sama røktarheiminum, Life Care Center. Røktarheimið er í Kirkland, sum er ein forstaður til stórbýin Seattle í USA.

Av teimum 150, sum í alt eru deyð av koronasmittuni í USA, eru 65 deyð í statinum Washington, har júst Seattle er størsti býurin.

Amerikanski stovnurin fyri smittusjúkur og fyribyrging, CDC, hevur kannað røktarheimið Life Care Center, og niðurstøðan er tann, at fleiri starvsfólk fóru til arbeiðis, sjálvt um tey vóru sjúk, og at fleiri av teimum arbeiða á ymsum stovnum fyri at forvinna sær nokk til livikostnaðin - og soleiðis kunnu spjaða smittuna.

- Starvsfólkunum tørvaðu pengarnar, tey hava ikki sjúkrafráveru, tey kenna ikki sjúkueyðkennini - ella vilja ikki viðurkenna, at tey hava verið sjúk, sigur Jeff Duchin, sum er lækni á staðnum. Hann leggur afturat, at ongin hugsaði um covid-19, tá farsóttin júst var byrjað. Granskararnir funnu eisini eina aðra orsøk til, at so nógv doyðu, nevniliga at starvsfólk manglaðu persónliga trygdarútgerð og at tað var ov lítið av uppvenjing í samband við smittuna.

David Grabowski, sum er granskari við Harvard Universitetið, sigur, at nógv av starvsfólkunum á ymsu røktarheimunum eru láglønt og arbeiða tí eisini í bæði handlum og matstovum fyri at klára seg.

- Vit kunnu vænta at uppliva nógv líknandi virusútbrot, sum hetta í Kirkland, sigur David Grabowski at enda.