Økið eystan fyri Dalin Langa í Hoyvík, sum hevur fingið navnið Stórabrekka, varð í kommunuætlanini frá 2014 lagt út sum møguligt býarvakstrarøki í Hoyvík. Í hesum sambandi verður Stórabrekka nú skipað til bústaðarbygging.

Fýra arkitektavirki eru boðin inn at geva tilboð uppá projektering, útbjóðing og projektuppfylging sum heildarráðgeving av nýggjari útstykking á Stórubrekku í Hoyvík.

Endamálið við kappingini er at finna fram til bestu loysnina - at skapa ein dámligan býling á Stórubrekku við áleið 100 bústaðareindum, sum skulu vera við til at nøkta ein part av bústaðartørvinum í høvuðsstaðnum.

Økið, sum er áleið 55.000 m2, liggur á eini høvd omanfyri vinnuøkið við Vegin Langa í 100 metra hædd við stórslignum útsýni móti norðuri, eystri og suðri. Somuleiðis liggur økið út til Dalin Langa, sum er eitt rekreativt øki við gongu- og súkklubreyt og uppihaldsøki við Myllutjørn.

Ynskið er at fáa ein vælvirkandi býling við nærleika til gerandis hentleikar og grøn øki, ið longu eru staðsett í nærumhvørvinum. Trivnaðurin skal vera í hásæti, tí skal bygging í økinum tillagast til nærumhvørvið og lívið millum bygningarnar, samstundis sum hugsast skal um neyðuga tættleikan, ið skal til fyri at gagnnýta avmarkaða lendið á bestan hátt.

Útstykkingin verður skipað sum raðhúsabygging, har grund og eldverjuveggir fyrst verða gjørdir, sum einstøku keypararnir síðani seta sín dám á - eins og vit kenna frá býlingunum Millum Gilja og Inni á Gøtu. Hesar byggingarnar eru samansettar av húsum, ið eru bygd eitt og eitt í senn.

Úrslitið er ein fín javnvág millum fría valið hjá hvørjum einstøkum eigara av innrætting, tilfari og litum og so felags heildina, sum støddir, tekjur og samanbyggingar hava við sær. Harumframt er møguleiki at gera nøkur punkthús við íbúðum, men raðhúsabyggingin skal vera ráðandi. Stødd á grundstykkjum/raðhúsum verða áleið 200m2.

Tíðarætlan

Mett verður, at byggingin kann fremjast í tíðarskeiðnum:
• forprojektið liðugt 1. oktober 2020
• útboð januar 2021
• arbeiðið byrjar februar 2021

Nýggja uppskotið skal í eini tilgongd við teknisku fyrisitingina góðkennast, áðrenn farið verður víðari í verkætlanini.

Teir innbodnu ráðgevararnir eru:
• Arkitektar 99
• Kontrast
• SNA Arkitektar
• BRIM Arkitektar

Freistin at lata tilboð inn er fríggjadagin 17.04.2020 kl. 13.