Bókin telur 190 blaðsíður og hevur níggju kapitlar. Haraftrat er ein epilogur, sum Godfrey Baldacchino hevur skrivað. 

Tekstirnir hyggja at hesum oyggjasamfeløgunum: Grønlandi, Føroyum, Hawai’i, Tasmania, Puerto Rico og Okinawa, sum hoyrir til Japan. Firouz Gaini hevur skrivað fyrsta kapittul, “Gender, Change and Continutiy in Island Communities”, saman við Helene Pristed Nielsen. Haraftrat hevur hann skrivað ein kapittul um kyn, samleika og militarismu í Okinawa í Japan. Erika A. Hayfield hevur skrivað tekstin úr Føroyum.

Hendan bókin hevur eitt feministiskt útgangsstøði í síni viðgerð av kyni og sosialum ójavnaði í oyggjasamfeløgum kring heimin, samstundis sum hon umrøður “islandness”, ella oyggja-sereyðkenni, í sínum (“intersectional”) greiningum.

Bókin byggir brúgv tvørturum eitt vitanar-op við at kanna kyn, kynsrelatiónir, ávirkan og politikk í fjølbroyttum oyggjaumhvørvum kring heimin – úr Føroyum og Grønlandi í norðuri til Tasmania í suðuri. Og bókin gevur innlit í nútíðar samfelagsmenning og kynsligar rembingar á hesum plássum, og vísir á fløkjasligu sambondini millum kyn og stað í einum lokalum og globalum heimi.

Bókin er áhugaverd hjá lesandi og granskarum í kynsfrøði, mentanarfrøði, oyggjafrøði  - á enskum “island studies”, antropologi, og í høvuðsheitum í sosiologi, landafrøði, margfeldis- og fólkaræðisgransking og altjóða viðurskiftum.