Heimabitin - nýggjur talgildur pallur frá Norðurlandahúsinum
Heimbitin er heitið á nýggjum talgildum tilboði frá Norðurlandahúsinum, har fólk kunnu uppliva tónleik, sjónleik, fyrilestrar, skaldskap og mangt annað úr øllum norðurlondum, uttan at fara heimanífrá.
Gunn Hernes, stjóri í Norðurlandahúsinum, sigur soleiðis:
”Norðurlandahúsið vil fyrst og fremst takka øllum teimum, sum halda á fram at savna okkum við góðum upplivingum. Sjónleikarhús, konsertsalir og listasøvn allastaðni standa tóm. Í staðin er talgildi pallurin blivin høvuðspallurin hjá listini. Vit vilja virka fyri, at vit øll fáa góðar lista- og mentanarupplivingar hesa tíðina. Talgildu pallarnir eru á tremur við stroymingum og øðrum tilboðum. Vit fara tískil at savna eina skrá av upplivingum, sum okkara norðurlendsku samstarvsfelagar bjóða, og sum vit ynskja at deila við tykkum.”
Á heimasíðuni hjá Norðurlandahúsinum verður tú leidd/ur trygt ígjøgnum alnótsfrumskógin, og tú fært eitt breitt úrval av list og mentan, sum tú kanst njóta har tú ert, inntil vit aftur sleppa at hittast í okkara Norðurlandahúsi. Okkurt verður sent beinleiðis, meðan annað kann upplivast, tá hugurin er til tað. Nýggj tiltøk verða løgd afturat javnan, skrivar Norðurlandahúsið í tíðindaskrivi.
Sí skránna á nlh.fo/heimabitin
Mest lisið í farnu viku
Samband
Heygsvegur 8
490 Strendur