Earth Hour við vónríkum trompettónum í tryggari frástøðu
Eins og undanfarin ár, skipar Fuglafjarðar kommuna fyri Earth Hour leygardagin 28. mars kl. 20.30.
Í hesum korona og umhvørvis-umhugsnu tíðum verður tað eitt #samanhvørsær #unplugged tiltak, har Johan Hentze fer at spæla dragandi og vónríkar trompet-tónar, við temanum ljós.
Visit Fuglafjørður siga, at tey útnytta serliga amfi-teatur skapið, sum Fuglafjørður hevur, har Mentanarhúsið liggur sum pallur og bygdin liggur eftir fjallasíðunum rundanum. Johan Hentze fer tískil at spæla nøkur løg úr Mentanarhúsinum móti bygdini. Vónin er, at um fólk fara útum ella lata vindeyguni upp, so berast tónarnir móti húsunum.
Earth Hour er eitt átak, sum WWF skipar fyri hvørt ár í mars. Einstaklingar, fyritøkur, kommunur og býir í øllum heiminum seta umhvørvið í brennidepilin hendan dagin.
Í Fuglafirði verða nærum øll ljós sløkt, bæði gøtuljósini í kommununi, ljósini á havnalagnum, sum ikki eru alneyðug, og ljósini á vøllinum. Visit Fuglafjørður vónar, at fólk í Fuglafirði aftur í ár taka væl ímóti átakinum og sløkkja allan óneyðugan streym hesa løtuna.
Mest lisið í farnu viku
Samband
Heygsvegur 8
490 Strendur