- Vit skulu uppføra okkum, sum tann læknafakligi parturin hevur mælt til, segði landsstýrismaðurin í heilsumálum, Kaj Leo Holm Johannesen, millum annað á tíðindafundinum í dag.

Sjálvandi skulu vit tað. Tað er eingin, ið setur spurnartekin við tilmælini: vaska hendurnar, halt frástøðu, ver inni v.m.

Men sum samfelag kunnu vit ikki bara taka atlit til læknafakliga kunnleikan.

Korona er vandamikið fyri ávísar aldurs- og samfelagsbólkar, men vit kunnu ikki forsøma aðrar bólkar í samfelagnum.

Átøkini hava til endamáls at tálma spjaðingini, men tey hava eisini fatalar avleiðingar fyri aðrar samfelagsbólkar. Serliga vinnulívið.

Vit kunnu koma í ta margháttligu støðu, at vit steðgaðu smittuni, men vit mistu vinnulívið.

Tí er tað alneyðugt, at vit ikki bara taka atlit til ávisar aldurs- og samfelagsbólkar, sum læknafakligi kunnleikin mælir til, men vit taka atlit til allar samfelagbólkar í landinum.

Kom nú, Bárður, vit hava brúk fyri at taka atlit til heildina!

Tað skrivar skrivari hjá tingbólkinum hjá Fólkaflokkinum, Hanus Samró á facebook-vanga sínum.