SEV fer at seta tvey sveimandi orkuverk í Vestmannasund
SEV ætlar at seta tvey sveimandi orkuverk út í Vestmannasund. Orkuverkini eru formað sum undirvatns-drekar. Orkuverkini verða sett út á 50-60 metra dýpi, og tað verða umleið 150 metrar ímillum tey.
Drekarnir eru festir við tjóðri í fundament á botninum, og fara at sveima á 20-40 metra dýpi, tá streymur er, men hanga á 8 metur dýpi í kyrrindum. Teir ferðast í einum áttatalsmynstri, sum er 40 til 60 metrar breitt. Drekarnir sveima umleið 6 - 10 metrar um sekundið. Hvør dreki er fimm metrar langur og vigar umleið 1,4 tons.
Drekarnir hava ein framleiðslumátt á 100 kW (kilowatt) hvør. Fyribilsmetingar vísa, at teir kunnu framleiða umleið 300-400 MWh (megawatt-tímar) um árið hvør. Hetta samsvarar til elnýtsluna hjá umleið 120-160 sethúsum.
SEV hevur gjørt eina árinsmeting, sum viðger, hvørja ávirkan verkætlanin kann hava á náttúru og umhvørvi. Her er hugt eftir árini á fisk, sjófugl, hval og kóp.
Mett verður, at royndarverkætlanin ikki fer at hava stórvegis árin á fisk og sjófugl, men at havsúgdjór helst er tann viðbreknasti bólkurin.
Møgulig átøk, ið kunnu tálma árin á hval og kóp, eru viðgjørd í árinsmetingini. Umhvørvisstovan hevur sett ávísar treytir til SEV, eitt nú, at SEV skal fylgja við, hvussu hvalur og kópur ferðast í Vestmannasundi í verkætlanartíðini, sum er tvey ár.
Mest lisið í farnu viku
Samband
Heygsvegur 8
490 Strendur