Í gjárkvøldið ljóðaði, at ítøkiligar ætlanir eru eisini at fáa Atlantic Airways inn undir FAS-skipanina, sum annars er ætlað skipum. Sum skilst vil andstøðan ikki vera við til hetta, men samgonga skal seta uppá, at Atlantic skal undir FAS.

Vit hava aftur seinnapartin roynt at fingið orðið á landsstýrismannin í fíggjar- og samferðslumálum, Jørgen Niclasen, men tað hevur ikki eydnast. Hinvegin hava vit fingið váttað frá øðrum framstandandi samgongulimum, at samgongan og landsstýrið av álvara arbeiða við ætlanum um, onkursvegna at leggja Atlantic Airways inn undir FAS.

Tá tað kemur til skipsmanningar, so gjalda reiðaríini so mikið høga løn til manningarnar, at lønin eftir skatt skal liggja nøkurlunda á hædd við lønir ella hýrur, sum t.d. Norskar manningar fáa frá norskum reiðaríum.

Men skipanin í FAS er soleiðis, at av útgoldnu lønini ella hýruni ber tað almenna ein part aftur til reiðaríini.

Og tað er ivaleyst hendan afturberingarskipanin, sum landsstýrið nú onkursvegna ætlar at nýta í sambandi við Atlantic Airways.