Franska “CMA CGM” er fyrsta reiðaríið í nógv ár, sum velur at sigla suðurum Afrika heldur enn at sigla gjøgnum Suesveitina. 

16.020 teu stóra “Alexander Humboldt” er á veg niður við afrikansku vesturstrondini á veg úr Algeciras í Spania til Malaysia.  Samstundis er 15.000 teu stóra “CMA CGM Chile” í Indiahavinum á veg til Le Havre – og tað fer eisini suðurum Góðvónar-høvda í Suðurafrika. Eitt “teu” er tað sama sum ein 20-fóts-bingja.

Tað er ikki hent í nógv ár, at bingjuskip eru farin umvegin upp á 3.000 fjórðingar fyri at sleppa undan Suezveitini á veg til ella úr Evropa. At tað hendir nú, er millum annað grundað á lága bunkaraprísin, og stóra yvirkapasitetin á heimsmarknaðinum orsakað av koronakreppuni.

Hjá franska bingjuskipinum, Alexander Humboldt, tekur tað fimm dagar eyka at koma fram, so túrurin tekur 26 dagar í staðin fyri 21. Hóast ferðin á skipinum er sett upp við tveimum mílum, so verður túrurin fimm dagar longri, enn um skipið fór gjøgnum Suezveitina.

- Tað merkir, at skipið nýtir eini 1.000 tons meira í bunkarolju, skrivar Lars Jensen, ein av yvirmonnunum á Alexander Humboldt, á Linkedin.

Hann leggur aftrat, at skipið hevur skrubbara, og at eyka bunkaroljan kann keypast fyri 200 dollarar fyri tonsið. Tað hevur meirútreiðslur við sær upp á umleið 200.000 dollarar. 

Men tað er framvegis nógv minni enn kostnaðurin fyri at sigla gjøgnum Suesveitina, sum liggur um 4-500.000 dollarar fyri eitt skip Alexander Humboldt.

150 farmarutur eru avlýstar úr Asia bara hesar seinastu fáu dagarnar, skrivar danska blaðið “Søfart” sambært Áhugafelagnum Antares.