Ovurríka saudiarabiska “Public Investment Fund” hevur keypt 8,2 prosent av partabrøvunum í kreppurakta amerikanska krúsreiðarínum, Carnival Cruises. Krúsreiðaríið missir í løtuni eina milliard dollarar um mánaðin, tí allar ferðir eru avlýstar orsakað av óttanum fyri korona.

Stóra tapið – saman við ótryggu framtíðini - koyrir partabrøvini hjá krúsreiðarínum í botn, og hesum gera saudiarabarar sær nú dælt av. Public Investment Fund hevur lagt 450 milliónir dollarar á borðið fyri 8,2 prosent av partabrøvunum.

Hetta er nógvur peningur, men bara ein lógvi úr lummanum hjá ovurríka grunninum, sum eigur virðir fyri meira enn 300 milliardir dollarar.

Tað er verri enn so fyrstu ferð, at Public Investment Fund keypir upp í USA. Grunnurin eigur longu stórar ognir í feløgum sum Tesla og Uber Technologies.

Carnival Cruises hevur 124 reikferðaskip í flota sínum, og væntar at avlýstar ferðir, útreiðslur til manningar og svínabundin reikferðaskip fara at kosta reiðarínum umleið eina milliard dollarar um mánaðin komandi mánaðirnar.

Kelda: antares/Maritime Danmark