Vága kommuna: Heimatænastan letur varisliga upp aftur
- Vit gleðast um, at vit spakuliga kunnu økja um virksemi okkara. Allar tænasturnar verða settar í verk aftur eftir einum skipaðum leisti, ið tekur atlit til framhaldandi at forða fyri smittu, sigur Jóngerð M. Nielsen, sum er leiðari í Heimatænastuni í Vágum.
Soleiðis verður farið til verka í fyrstu atløgu:
Heimahjálp og heimasjúkrarøkt
Hendan tænastan økist aftur stigvíst, og verður gjørt í samstarvi við tørvsmetarar og borgararnir.
Dagtilboð Ivanshús
Borgarar sum eru tilknýttir dagtilboðnum, byrja nú stigvíst aftur. Tað verða 2 – 3 borgarar sum byrja hvørja viku, inntil allir eru byrjaðir aftur. Teir fyrstu byrja 11. mai 2020, og borgararnir fáa beinleiðis boð frá starvsfólki í Ivanshúsi, nær teir kunnu byrja.
Døgurðaskipan
Heimabúgvandi borgarar, sum eru í døgurðaskipanini, fáa døgurðan koyrdan heim sum vanligt.
Heimið á Sýnini
Nú vit lata upp fyri, at avvarðandi kunnu koma inn at vitja, hava vit gjørt eina ætlan fyri, hvussu hetta verður gjørt best.
Vitjunartíðir verða skipaðar í tíðarskeiðnum dagliga millum kl.15.00 og 18.00.
Avvarðandi, í fyrstu syftu fyrsti og annar kontaktpersónur, fáa eina tíð, har tey kunnu koma og vitja. Eitt starvsfólk, sum er á vakt, hevur ábyrgdina av at vísa avvarðandi inn á búrúmið, tryggja at tíðin verður hildin og at avvarðandi fara beina kós út.
Avvarðandi skulu ganga inn ígjøgnum ávísar hurðar, og spritta hendur við nærmasta sprittdunki. Avvarðandi skulu bara vera inni í búðrúminum alla ta tíðina tey eru og vitja. Um avvarðandi hava tørv á wc vitjan, skal wc hjá teirra avvarðandi nýtast. Tá vitjunartíðin er liðug kemur starvsfólkið og boðar frá, og vísir á, hvar tey spritta seg á veg út og vísa avvarðandi út aftur rættan veg.
Vit hava ikki møguleika at bjóða kaffi og te í fyrstu atløgu. Avvarðandi eru vælkomin at hava eitt hvørt við sær, kaffi/te ella okkurt søtt.
Starvsfólkið hevur mannagongdir, sum tey kunnað avvarðandi um, tá vitjað verður.
Fyri at minka um smittuvandan, verða flaturnar á kamarinum sprittaðar, tá avvarðandi eru farin.
Umlætting
Vit byrja stigvíst at taka borgarar inn til umlætting, og í fyrstu syftu koma tveir borgarar til umlætting. Tann fyrsti borgarin kemur inn 19. mai 2020, og tann næsti kemur tann 26. mai 2020.
Teir borgarar sum fyrst fáa møguleikan at koma til umlætting, fáa boð í komandi viku. Síðani verður upptøkufundur at viðgerða víðari umlættingar, og borgararnir og avvarðandi fáa beinleiðis boð.
Fótarøkt
Fótarøkt kann byrja á Heiminum á Sýnini tann 18. mai 2020. Fótarøktir fylgja tilmælum, og skulu avtala tíðir við starvsfólk á deildunum.
Hárfríðkan
Um búfólk ynskja hárfríðkara kann hetta gerast í samráð við deildina. Hárfríðkari fer tá at veita tænastu á kamarinum hjá búfólkinum.
Tannrøkt og tannlækni
Um búfólk hava tørv á tannlækna ella tannrøktara, verður hetta avtalað millum búfólk, avvarðandi og starvsfólk á deildini.
Terapeutar
Hesar tænastur verða eisini stigvíst øktar, og serligar skipanir verða galdandi restina av mai og juni mánaða. Terapeutar fara nú eisini at veita tænastu aftur til heimabúgvandi borgarar frá 13. mai 2020.
Fimleikur
Hendan tænastan verður ikki sett í verk fyribils.
Virksemi annars á Heiminum á Sýnini
Virksemi av ymiskum slag, sum andaktir, sangløtur, kórsangur, vitjunarvinir o.a., verður ikki tikið við í fyrsta stigi í upplatingini.
Vit vóna øll taka væl ímóti fyribils skipanini, og síggja fram til at kunna lata enn fleiri tænastur upp, sigur Jóngerð M. Nielsen, leiðari Heimatænastan í Vágum, at enda.
Mest lisið í farnu viku
Samband
Heygsvegur 8
490 Strendur