Løgmaður boðaði í gjár frá, at Føroyar lata uppaftur meira upp, og at frástøðan fer frá tveimum metrum niður í ein metur, samstundis sum bólkar uppá 100 nú kunnu savnast. Møguleiki er tískil at bjóða fleiri tænastur og fleiri gestum í svimjihøllina.

Torkil Mørkøre, leiðari í Svimjihøllini í Klaksvík, sigur við heimasíðuna hjá Klaksvíkar kommunu, at hetta tíðaskeiðið hevur verið heilt serligt.

- Vit fóru frá methøgum vitjunartølum til púrasta tóma svimjihøll, og hevur svimjihøllin orsaka av øktum smittuvanda verið ein av teimum kommunalu stovnunum. Vit hava tikið tilmælini í størsta álvara, tí vit eru púra greið yvir, at vit í svimjihøllini verða noydd at taka heilt serlig atlit til eitt nú reinføri.

-  Vit eru nú klár til at lata enn meira upp, og eru starvsfólkini serstakliga spent til at bjóða børnum og vaksnum nær og fjar vælkomnum aftur, sigur Torkil Mørkøre.

Øll stig eru tikin í samráð við korona-vegleiðingina, og samskift verður eisini við korona-vegleiðingina um, nær vælveruøkið kann lata upp aftur.