- Vit skulu hava undirvísing í føroyskum fyri útlendingar, sum flyta higar
Børn og ung verða ávirkað av enskum, men Rakul Skaale Andreasen, sum fríggjadagin helt sín MA-fyrilestur, er optimistisk, tí tey ungu virðismeta føroyskt.
- Ja, eg eri optimistisk um málsligu framtíðina, tí kanningarnar hjá mær vísa, at tey ungu virðismeta føroyskt, og at tey vilja halda fast í tí føroyska.
Tað sigur Rakul Skaale Andreasen, sum fríggjadagin helt sín MA-fyrilestur um ávirkanina úr enskum.
Rakul Skaale Andreasen greiddi frá, at kanningar aðrastaðni vísa, at tá talið av ensktmæltum fólki í einum landi verður 30 prosent, so hendir eitt málskifti. Tá fara borgararnir í landinum frá at tosa sítt egna mál til at tosa enskt.
Men, sum sagt, so stendur ikki eitt málskifti fyri framman í Føroyum, heldur Rakul Skaale Andreasen. Og tað er hóast vit hava fingið enskt afturat tí danska, sum gerandisfylgisvein málsliga.
- Tá tað er sagt, so mugu vit vera á varðhaldi. Mín politiska áskoðan er, at vit skulu hava undirvísing í føroyskum fyri útlendingar, sum flyta higar. Um tað skal vera eitt krav, at tey eisini skulu standa eina roynd, tað veit eg ikki. Men eitt krav um málsliga undirvísing í føroyskum mugu vit hava, sigur Rakul Skaale Andreasen, sum í dag fekk sítt masterprógv í føroyskum.
Mest lisið í farnu viku
Samband
Heygsvegur 8
490 Strendur