Í skrivi frá Javnaðarflokkinum verður sagt, at í løtuni er einki, sum forðar stórari útlendskari fyritøku ella ríkum einstaklingi at keypa risa økir av jørð ella fyri tann skuld meginpartin av húsunum í lítlari bygd ella oyggj. Hesum má bindast fyri, halda Javnaðarflokkurin og Tjóðveldi, sum taka undir við uppskotinum hjá Tjóðveldi um at forða útlendingum at keypa jørð og bústaðir í Føroyum.

Men umboðini fyri Sambandsflokkin, Fólkaflokkin og Framsókn eru ósamd. Tey mæla løgtinginum frá at samtykkja uppskotið, tí at tað vil vera at diskriminera okkara grannar og útlendingar sum heild, um ikki vit loyva hesum at keypa sær ognir her.

Javnaðarflokkurin og Tjóveldi vísa á, at:

- Føroyska landøkið við 18 oyggum er sera avmarkað í stødd, bygdir og býir eru smá, og avleiðingarnar av útlendskum uppkeypi er tí størri. Tí er neyðugt at hava greiðar reglur fyri, í hvønn mun útlendingar, uttan tilknýti til Føroyar, kunnu keypa hús og jørð í Føroyum.

Vinnunevndin hevur fingið upplýst frá ognarmeklara, at í onkrari bygd í Føroyum hava útlendingar keypt fleiri hús, og at áhugin frá útlendingum sum heild er stórur.

Onnur lond hava ásetingar um avmarkingar hjá útlendingum at keypa jørð, bústaðir ella summarbústaðir, m.a. fyri summarbústaðir í Danmark. Í Álandi er sonevndi “Hembyggdsratt”, har bert fólk, sum hava bústað ella hava búð í ávíst tíðarskeið í Álandi, hava rætt at keypa jørð, bústað og fastogn.

- Hetta kundu vit eisini gjørt í Føroyum, halda Javnaðarflokkurin og Tjóðveldi.