Á síðuni www.ferðastíføroyum.fo ber til hjá føroyingum, sum brellast eftir at ferðast í egnum landi, at velja millum 7 ymiskar ferðapakkar kring landið. Hesir fevna m.a. um gisting á gistingarhúsi, upplivingar úti í náttúruni, og góðar matarupplivingar. Talan er um pakkar til serprísir, og teir leggjast afturat komandi tíðina.

Hugskotið at gera eitt átak fyri at stimbra undir føroyska innanlands ferðavinnu birtist, nú veitarar í tveir samfullar mánaðir støðugt hava fingið boð um avlýsing omaná avlýsing frá útlendskum ferðandi, og lítið var at síggja fram til.

- Nú tað gjørdist greitt, at landamørkini ikki verða latin upp, og at so at siga ongar bókingar fara at koma umvegis Guide to Faroe Islands til føroysku ferðavinnuveitararnar í summar, er átakið “Ferðast í Føroyum” eitt upplagt høvi hjá føroyingum at uppliva nakað av tí, sum føroyska ferðavinnan hevur at bjóða - alt til serprís, boðar Guide to Faroe Islands frá.

Tilboðini kunnu longu nú síggjast á heimasíðunum www.ferðastíføroyum.fo og á www.guidetofaroeislands.fo.