Tað 4.045 teu (1 teu er tað sama sum ein 20-fóts-bingja) stóra bingjuskipið, og manningin uppá 25, fór úr Panama 1. mai við kós móti Algeciras í Spania.

Stutt eftir fráferðina úr Panama fekk ein av manningi tekin um at vera smittaður við koronavirusinum. Lexa Maersk breyt siglingarætlanina av, og fór inn á Vestindisku Oyggjunum, har manningin kom undir læknahond á einum sjúkrahúsi. Síðan helt skipið fram leið sína móti Spania.

Á vegnum fingu fleiri av manningini koronatekin, og hesi vórðu sett í avbyrging á kømrum sínum. Reiðaríið valdi av hesi orsøk, at skipið í staðin fyri at fara til Algeciras, skuldi sigla beinleiðis til Rotterdam í Hollandi.

Mánamorgunin 18. mai kom Lexa Maersk til Rotterdam, har royndir vórðu tiknar av allari manningini. Royndirnar vístu, at fýra av manningini – aftrat honum, sum varð innlagdur á Vestindisku Oyggjunum, høvdu fingið koronasmittuna. Tey smittaðu sita framvegis í avbyrging umborð á Lexu Maersk.

Tað skrivar Maritimedanmark og Áhugafelagið Antares.