Andstøðan vil hava fjarskiftisnet og 5G-tøkni á dagsskránna
Andstøðan vil í samráð við løgann og landsstýrismannin í uttanríkismálum um fjarskiftisnet, 5G-tøkni, trygdar- og verjupolitikk og um samráðingar við donsku stjórnina.
Høgni Hoydal og Heðin Mortensen, sum hava undirskrivað áheitanihna, vilja hava løgmann og landsstýrismannin í uttanríkismálum at svara spurningum, sum snúgva seg um hesi øki:
- Samskifti, samráðingar og avgerðir landsstýrisins í málinum um fjarskiftisnet, 5G-tøkni og trygdar- og verjupolitikk.
- Samskifti og samráðingar við donsku stjórnina og aðrar útlendskar stjórnir og myndugleikar um hesi mál.
- Hví og við hvørjari heimild løgmaður sendir út tíðindaskriv um, at fjarskiftismál og avgerðir um hetta, sum er føroyskt málsøki, skal gerast partur av trygdar- og verjupolitikki og koma undir danska lóggávu.
- Hví landsstýrið ikki hevur ráðført seg við Uttanlandsnevndini um hesi mál sambært stýrisskipanarlógini §54.
Høgni Hoydal og Heðin Mortensen siga í áheitanini, at síðani løgmaður sendi tíðindaskriv út um málið 13. mai 2020, hava umboð fyri bæði andstøðuflokkar og samgonguflokkar alment funnist at boðskapinum og framferðini hjá løgmanni.
Teir vísa á, at formaðurin í Uttanlandsnevndini, sum er Bill Justinussen, hevur reist spurningin um, hvørt løgmaður hevur hildið ráðførslukravið sambært Stýrisskipanarlógini §54.
Enn hevur landsstýrið ikki biðið um ráðførslu í hesum týðandi máli.
“Tí heita vit á formannin og allar nevndarlimirnar um at taka undir við at biðja løgmann og landsstýrismannin í uttanríkismálum um at koma á fund í Uttanlandsnevndini at svara spurningum um málið,” siga Høgni Hoydal og Heðin Mortensen.
Mest lisið í farnu viku
Samband
Heygsvegur 8
490 Strendur