100 føroyingar royndarkoyra Føroyska samleikan
Landstýrismaðurin í fíggjarmálum, Jørgen Niclasen, fer nú at royndarkoyra talgilda Samleikan, sum er partur av Talgildu Føroyum, saman við 100 øðrum føroyingum. Í heyst kunnu allir føroyingar brúka skipanina.
Talgildu Føroyar seta nú Samleikan og Vangan í verk. Hetta verður gjørt í stigum, og í hesum sambandi fekk Jørgen Niclasen, landsstýrismaður í fíggjarmálum, sín føroyska Samleika í dag.
Samleikin er nýggj talgild innritan og undirskrift hjá føroyingum og kemur í staðin fyri MínLykil og danska NemID.
Tá tað í heyst fer at bera til hjá øllum føroyingum at stovna nýggjan samleika, skalt tú taka samleikaappina niður á fartelefonina, taka mynd av passinum og mynd av tær sjálvum. Síðan verða upplýsingarnar eftirkannaðar hjá brúkaratænastuni, sum skal vátta, at upplýsingarnar og samleikaprógvið samsvara.
Samleikin fer millum annað at kunna brúkast til at rita inn á Vangan, sum nýggi tænastuportalurin til borgarar eitur.
Á Vanganum vera at byrja við á leið 40 nýggjar sjálvgreiðslur og tænastur frá ymiskum almennum stovnum at finna. Harumframt verður atgongd eisini til Mínboks í nýggjum hami.
Vangin skal gera tað lættari, skjótari og tryggari hjá føroyingum at avgreiða egin viðurskifti talgilt.
Næsta ár fara føroysku peningastovnarnir eisini at bjóða kundum sínum at brúka Samleikan fyri at fáa atgongd til netbankan.
Mest lisið í farnu viku
Samband
Heygsvegur 8
490 Strendur