Ferðist í egnum landi
Vist Faroe Islands, kunningarstovur, kommunur og Ferðavinnufelagið eru saman um nýtt átak, ið eggjar føroyingum at ferðast í egnum landi í summar. Endamálið er at varpa ljós á mongu frálíku vørurnar og tænasturnar, ið eru mentar hesi seinastu árini, og at fáa føroyingar at ferðast í Føroyum og harvið stuðla lokalu vinnuni.
“Lat hini eiga Eiffeltornið, Frælsisgudinnuna og pyramidurnar – Føroyar eiga Kallin. Ein sjáldsama vakur túrur og ein sólarklárur møguleiki hjá familjum og vinarbólkum.”
Soleiðis ljóðar brot úr lýsing á nýggju heimasíðuni ferðist.fo.
Heimasíðan verður sýnisgluggi fyri upplivingar og tænastur kring alt landið, og vendir sær ímóti familjum, bólkum og einstaklingum. Á heimasíðuni ber til at finna sær íblástur til upplivingar í Føroyum, eins og tað er møguligt at keypa útvaldar upplivingar.
Fyriskipararnir vísa á, at Korona kreppan rakti júst sum føroyska ferðavinnan gjørdi seg til reiðar at taka ímóti met nógvum útlendskum ferðandi. Hetta er ein smeitur fyri ferðavinnuna, sum partarnir vilja gera sítt til at bøta um.
Ferðist í egnum landi bjóðar m.a. upplivingar við forvitnisligu heitunum “Nýtt uppá Stokkarnar”, “List og Hugni í Havn” og “Vatnið og Fiskastykkið”.
Fyrstu túrarnir verða gjørdir í juni, og sum frá líður verða fleiri upplivingar lagdar afturat vøruskránni.
Til ber at kunna seg nærri á heimasíðuni ferðist.fo og á facebook og instagram síðunum við heitinum “Ferðist í egnum landi”.
Mest lisið í farnu viku
Samband
Heygsvegur 8
490 Strendur