Tað var hin 25. mai, at amerikumaðurin George Floyd varð handtikin og dripin á gøtuni av løgreglumanninum Derek Chauvin.

Morðið á George Floyd varð filmað og lagt á sosialu miðlarnar, og øll verðin hevur hugt við. Kring allan heim vísa fólk nú sína ónøgd - á sosialu miðlunum og á gøtuni - um, at fólk enn í 2020 dag og dagliga eru fyri rasismu av alskins slagi, siga fyriskipararnir av føroysku mótmælisgonguni.

Og sunnudagin verður altso farið á gøtuna í Havn at mótmæla rasismu, og at tað enn í dag verður gjørdur mismunur á fólki vegna teirra húðarlit og uppruna. Samstundis vilja fyriskipararnir eisini vísa samhuga við teimum, sum eru fyri rasismu - bæði í Føroyum og úti í heimi.

Mótmælisgongan byrjar kl. 14 við heimagjørdum skeltum, bannarum og øðrum. Síðani verður farið oman í perlutorgið, har JASMIN spælir nøkur løg, og annars er orðið frítt. 

Unga Tjóðveldið, Sosialistisk Ung, Unga Sambandið, Ungt Sjálvstýri, Framsøkin ung og Amnesty stuðla mótmælisgonguni.