Gongur væl hjá Vónini
Tað gongur væl hjá Vónini í Fuglafirði. Úrslitið fyri samtakið í 2019 var 52,9 mió.kr.tað eru umleið 8 milliónir krónur meira enn í 2018.
Vónin sigur í fráboðan, at framgongd hevur verið á stórt sæð øllum rakstrarstøðum.
Sølan í Vónin samtakinum í 2019 var 522,4 mió.kr. í mun til 492,7 mió.kr. í 2018. Bróðurparturin av søluni liggur uttanfyri Føroyar.
Eginognin fyri Vónin-samtakið var 275,2 mió.kr. við ársenda 2019 í mun til 235,5 mió.kr. við ársenda 2018.
Umleið 400 fólk arbeiða í Samtakinum, og góða gongdin í fiski- og alivinnuni seinnu árini á okkara leiðum, hava gjørt, at vøkstur hevur verið í virkseminum í Føroyum. Seinastu árini hevur eftirspurningurin úr útlondum eftir útgerð frá Vónini eisini verið støðugt vaksandi.
Starvsfólkatalið í Føroyum er í tíðarskeiðinum 2010 til 2019 vaksið úr 62 til 100. Vónin hevur havt virkir í Kanada síðan 1989, í Grønlandi síðan 2002 og í Norra síðan 2008. Virksemið í hesum londum hevur seinnu árini verið vaksandi.
Framleiðsluvirkið í Litava, sum byrjaði í 2014, er við sínum 10.000 fermetrum og 200 starvsfólkum, við til at bera vøksturin í samtakinum. Framleiðslan í Litava ger, at veitingartrygdin og – tíðin eru munandi betri enn áður.
Vónin er veitari til fiski- og alivinnuna. Fiskivinnuútgerð fevnir um pelagisk og semipelagisk trol, botn- og rækjutrol, nótir, skiljiristir, trollemmar, rúsur osfr.
Til alivinnuna eru veitingarnar framleiðsla og søla av nótum, akkersskipanir, fuglanet eins og vasking og umvælingar av nótum osfr. Til aðrar vinnur selur Vónin veirar, ketur, tog, net, lyftiútgerð o.a. Vónin hevur virksemi í Føroyum, Kanada, Grønlandi, Íslandi, Norra, Litava og Russlandi, skrivar Vónin.
Mest lisið í farnu viku
Samband
Heygsvegur 8
490 Strendur