Fyrrverandi Oyrasundsferja undir illgruna at vera sjórænaraskip
Fyrrverandi Oyrasundsferjan, HAWA III, er undir illgruna fyri at vera við í álvarsomum maritimum brotsverkum og sjórænan, tað skrivar Dryad Global.
Ferjan hevur fyrr verið skrásett í Svøríki og varð upprunaliga bygd til farleiðina millum Keypmannahavn og Malmø í 1969. Tá æt ferjan M/S Malmø. Síðan tá hava fleiri ymsir eigarar átt ferjuna, og í 2017 endaði hon altso í Vesturafrika og eitur nú HAWA III.
Sambært Dryad Global kom ferjan til Libreville í Gabon frá Lomé í Togo mánamorgun, har hon varð hildin aftur. Hesa farleiðina plagar HAWA III at sigla, og tað er júst uttanfyri Gabon, at ferjan er undir illgruna at hava verið við sjórænarum.
Millum januar og juni í ár hava fýra fólkarán verið uttanfyri Gabon, sum er heilt nógv í mun til fyrr. Tað vóru til samanberingar ongi fólkarán uttanfyri Gabon um somu tíð í fjør. Enn vilja myndugleikar ongar almennar upplýsingar geva um ítøkiliga illgrunan til ferjuna.
Tað skriva Dryad Global og Maritime Danmark.
Mest lisið í farnu viku
Samband
Heygsvegur 8
490 Strendur