- Filmshúsið eigur at gera av, hvørjar filmsframleiðslur nýta afturberingarskipanina
Helgi Abrahamsen, vinnumálaráðharri, hevur svarað fyrispurningi frá Bjørt Samuelsen, tingkvinnu, sum snýr seg um at framleiða Trom í Føroyum.
Í svarinum sigur Helgi Abrahamsen:
Á løgtingsfíggjarlógini fyri 2020 eru 200.000 kr. játtaðar til afturbering til filmsframleiðslu, og lagt er sostatt ikki upp fyri, at verkætlanir koma í árinum, sum hava tørv á fleiri ferðir hesa upphædd. Tað ber tí ikki landsstýrismanninum til at tryggja, at henda framleiðslan verður í Føroyum.
Men landsstýrismaðurin heldur, at sendirøðin TROM er nýggjasta dømi um, at játtanin til skipanirnar, sum Løgtingið hesi seinastu árini hevur sett í verk, fyri at skunda undir føroysku filmsvinnuni, ikki hevur fylgt við stóru menningini í vinnuni.
- Eg fari tí at virka fyri, at játtanin til afturbering til filmsframleiðslu verður hægri. Ikki bara í teirri vón, at TROM kortini kann verða framleidd í Føroyum, men eisini fyri at tað ikki skal vera landsstýrið, sum frá ferð til ferð skal gera av, um hesin ella hasin filmurin skal fáa stuðul, Sigur Helgi Abrahamsen.
Hann heldur, at avgerðin, um, hvørjar framleiðslur lúka treytirnar fyri at fáa afturbering, eigur at vera hjá Filmshúsinum, sum eisini staðiliga hevur mælt til, at játtanin til afturbering verður økt.
- Filmsvinnan skal takast í álvara, og hon má fáa karmar, sum gera hana kappingarføra við filmsvinnuna í grannalondunum, sigur landstýrismaðurin.
Helgi Abrahamsen sigur, at júst sum skipasmíð verður stuðlað við parti av byggikostnaðinum fyri at tryggja kappingarførið, er neyðugt, at treytirnar fyri at framleiða film í Føroyum líkjast teimum, sum eru í londunum, sum vit kappast við.
- Í kappingini um filmsframleiðslur er afturberingarskipanin eitt tað týdningarmesta amboðið. Og ja - afturbering er ein stuðul, men tað er ein stuðul, sum gevur stórt samfelagsligt avlop.
Fyri hvørja krónu, sum verður afturborin, eru fýra krónur brúktar í Føroyum.
- Í døminum við TROM merkir tað, at verða 4 milliónir afturbornar, eru 16 milliónir brúktar til m.a. lønir til sjónleikarar og filmsfólk, gistingar, mat, leigu av hølum til upptøkur, bilaleigu o.a.
Samanumtikið hava vit í Føroyum lógargrundarlagið og tær grundleggjandi skipanirnar, sum eru neyðugar, fyri at filmsvinnan hevur karmar at mennast, men játtanin er ov tepur, sigur landsstýrismaðurin.
Helgi Abrahamsen sigur, at tað, sum krevst fyri at eggja filmsframleiðarum til at velja Føroyar fram um onnur filmslond, er serliga, at játtanin til film og til afturbering til filmsframleiðslu verður munandi økt, sigur landstýrismaðurin í vinnumálum at enda.
Mest lisið í farnu viku
Samband
Heygsvegur 8
490 Strendur