- Myndugleikarnir gera avgjørt onki fyri at bjarga lív í fátækraøkjunum, tí hava vit sæð okkum noydd at taka lagnuna í egnar hendur, sigur leiðarin í størstu favelaini í Rio-de-Janeiro, Wallace Perreira, við NRK.

Favela er heitið á brasilsku fátækrabýlingunum.

Favelain, Rochinha, hevur meira enn 100.000 íbúgvar. Tey búgva ógvuliga tætt, og trongt er í hvørjari smáttu. Ofta búgva trý ættarlið á nøkrum fáum ferðmetrum. Reinførið er avmarkað við opnari kloakk og tørvurin á vatni er stórur.

- Vit býta út mat, heilivág og heilsu- og reinførislutir. Vit kunna eisini íbúgvarnar um, hvussu tey skulu verja seg. Haraftrat sóttreinsa vit gøturnar við jøvnum millumbili. Og vit taka okkum serliga av teimum, sum eru í vandabólkinum, sigur leigarin í fátækrabýlinginum, Rocinha.

Og hann er sannførdur um, at tiltøkini, sum íbúgvarnir í fátækrabýlingunum í Brasil sjálvir hava sett í verk, hava bjargað túsundtals fólkum. Og tað sæst eisini aftur í hagtølunum.

Meðan talið á deyðum í fátækrabýlingunum er 21,7 fyri hvørjar 100.000 íbúgvar, er talið á deyðum í býunum sum heild heilt uppi á 56,2, sambært kanning, sum Polis-stovnurin hevur gjørt, skrivar altso NRK úr Rio de Janeiro.