Árliga fiskikappingin, sum EB/Streymur skipar fyri, var á Eiðisvatni – ella Suðuri á Vatni, sum eiðisfólk siga – seinasta vikuskiftið.

Tiltakið eydnaðist stak væl. Nógv fólk høvdu leitað sær hagar, fleiri at fiska og luttaka í kappingini, og onnur mest fyri at hugna sær. Fleiri campingvognar og telt vóru eisini at síggja, og nógv teirra komu longu hóskvøldið og vóru har alt vikuskiftið.

Fríggjakvøldið var hugnakvøld, har Signar í Homrum spældi undir til felags-sangin, og Bjarki Skaale bar fram røðu. Nógv fólk vóur komin saman til hesa hugnaløtuna.

Á middegi leygardagin endaði fiskikappingin. Størsta sílið fekk Elin Sólsker, tað vigaði 948 g., Jóhan Hansen var nr. 2 við síli, sum vigaði 916 g., og á triðja plássi var Elias Reinert Jacobsen við síli upp á 707 g. Vinnararnir fingu steyp og gávu frá Jógvan Weihe.

EB/Streymur ynskir vinnarunum hjartaliga til lukku og takkar øllum fyri eitt sera hugnaligt vikuskifti.

Tað skrivar Eb/streymur á heimasíðu síni. 

Myndirnar eigur facebook-vangin "Fiskikapping við Eiðisvatn"/ Sofus Johannesen