Eysturoyar kirkjubøkur lagdar fram í Løkshøll í kvøld
Í kvøld verða Kirkjubøkur fyri Eysturoynna lagdar fram í Løkshøll. Hetta verður kl. 19.00.
Tað er farið undir eitt miðvíst arbeiði at skriva av og prenta okkara kirkjubøkur.
Bøkurnar, har sóknarprestar hava skrivað øll tey í, sum teir doyptu, og hvussu lagna teirra var líka til tey doyðu. Hetta var ásett í norsku lóg, sum kom í gildi í Føroyum í 1688. Men longu árið fyri var prósturin á Nesi, sóknarprestur í Eysturoynni, farin undir at skriva kirkjubók fyri alla Eysturoynna. Henda bókin er tann einasta av teimum fyrstu kirkjubókunum, sum er varðveidd. Allar hinar hava verið skrivaðar, men eru misfarnar av sliti og eldsbruna.
Kirkjubøkurnar hava verið atkomuligar á landsskjalasavninum, og hava verið nógv lisnar. Men tørvur er á kostnaðarmiklum umvælingum fyri at tær ikki verða slitnar upp. Fyri at lætta um eru myndir tiknar av teimum og lagdar út á internetið, sostatt er tilfarið lættari at koma til.
Tó er ein stórur vansi, at flestu av teimum eru skrivaðar við gamlari skrift, og hetta forðar mongum at fáa gagn av skjølunum.
Petur Martin Rasmussen skrivaði elstu kirkjubøkurnar í Suðurstreymoy av, so tað bar til hjá vanligum fólki at leita í kirkjubókunum. Síðan gjørdi Poul Andreasen tað sama við elstu kirkjubókini í Suðuroy. Og Johan G. Mikkelsen hevur skrivað krikjubøkurnar fyri Eysturoynna og Norðoyggjar av. Og tað er júst kirkjubókin fyri Eysturoynna árini 1687-1832 og 1832-1892, sum verður løgd fram í Løkshøll í kvøld. Hon er tann fyrsta í røðini av kirkjubókum í Føroyum fram til 1892, sum verður almannakunngjørd.
Í kirkjubókunum er yvirlit yvir persónsnøvn og staðarnøvn, og til ber at síggja samskiftið millum bygdir og oyggjar í Føroyum í hesum tíðarskeiðnum.
80 ár skulu vera gingin áðrenn almmenningurin sleppur at lesa í kirkjubókunum, so ein onnur verkætlan verður fyri tíðarskeiðið 1892 til 1940.
Ætlanin er at fullfíggja røðina, soleiðis at Norðoyggjar, Vágar, Norðstreymoy, Suðuroy, Sandoy og Suðurstreymoy eisini verða prentaðar.
Felagið Varðin gevur bøkurnar út í samband við, at tað 17. desember 2021 eru hundrað ár liðin síðan síðsta hefti av fyrsta bindi hjá Varðanum kom út.
Tað skrivar Runavíkar kommuna.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur