Salmonbusiness vísir á, at føroyska bruttotjóðarúrtøkan er gott og væl 17 milliardir krónur, meðan virðið á Bakkafrosti í dag er gott og væl 24 milliardir krónur.

Salmonbussiness skrivar, at størsta fyritøkan í Føroyum allar tíðir hevur hugt úteftir – og hevur roynt at troytt møguleikar uttanlands. Fleiri av stóru eigarunum eru eisini útlendingar.

Til dømis er norski tryggingargrunnurin, Folketrygdfondet, størsti eigarin í Bakkafrosti við sínum 5,2 milliónum partabrøvum, eitt felag, sum verður mett at hava ein ógvuliga opnan eigarastruktur, skrivar Salmonbussiness.

Stjórin í Bakkafrosti, Regin Jacobsen, eigur saman við mammuni, Oddvør Jacobsen, 15,6 prosent í felagnum.

Salmonbussiness vísir á, at eftir at Bakkafrost keypti stóru skotsku alifyritøkuna, Scottish Salmon Company, framleiðir Bakkafrost 89.000 tons av laksi árliga. Soleiðis er Bakkafrost komið upp ímillum heimsins størstu alifyritøkur, og er í løtuni sætti-størsta alifyritøkan í heiminum.

Fimm teir størstu eigararnir í Bakkafrosti eru í løtuni hesir:

Størsti eigarin er Folketrygdfonden við 8,71 prosentum av partabrøvunum

Síðan kemur Regin Jacobsen við 7,8 prosentum

Oddvør Jacobsen við 7,77 prosentum

State Street Bank and Trust Company eigur 4,35 prosent

Og Dolfin Financial UK Limited eigur 3,82 prosent av partabrøvunum í Bakkafrosti.