Landsstýrismaðurin vísir á, at øll viðurskifti viðvíkjandi grindini eru ásett í grindareglugerðini og eru væl skipað av sýslumonnum og grindaformonnum. Hesir tryggja, hvør í sínum lagi, at galdandi tilmæli um frástøðu og hondreinføri verða fylgd, og at ansað verður eftir, at bert luttakarar sleppa fram at drápinum og upptøku, sleipi, merking, skifti, og tá skorið verður upp.

- Eg haldi, tað er eyðsæð, at rakstur og dráp kann fara fram innan galdandi karmar í samband við koronasmittuna, sigur Jacob Vestergaard, landsstýrismaður í fiskivinnumálum.

Landsstýrismaðurin metir, at skiftið av grindini eigur at verða avgreitt soleiðis, at ikki ov nógv fólk koma saman, tá seðlarnir koma út, og at tey, sum skera upp, halda seg til sín hval.

Yvirskipaðu skilhaldsreglurnar eru ásettar í § 9 í grindalógini. Øll, sum eru í grind á sjógvi ella landi, hava skyldu at lýða áheitanir, fyriskipanir, boð og forboð frá sýslumanni ella grindaformanni, sum fyriskipa grindadráp.