Vælkomin til Visit Eysturland
 
Eysturkommuna hevur ment ein nýggjan ferðavinnusamleika, hvørs endamál er at bjóða øll ferðavinnutilboð í økinum fram undir einum og sama flaggi.

Hetta, fyri at tað skal vera lættari hjá ferðafólki at finna runt í mongu tilboðunum, og eisini fyri at tað skal vera lættari hjá íbúgvunum í kommununi at bjóða sínar vørur og tænastur fram og at samstarva. 

Ferðavinnusamleikin er Visit Eysturland. Við heitinum gerst Eysturkommuna meira atkomilig hjá ferðafólki, og somuleiðis ber navnið brá av onkrum fornum og norrønum, sum júst er eitt av høvðuseyðkennunum við økinum. Her er aldargomul søga, og mangt forvitnisligt at vitja og granska. Búmerkið hevur eitt rúnarkent skap, sum tó hevur eitt nútímans snið. Soleiðis peikar samleikin aftur í tíð – og eisini fram í tíð.  

Ferðavinnan hevur tikið dik á seg í Føroyum, og eisini her í bygdunum í Eysturkommunu síggjast ferðafólk. Og tað er einki at siga til, tí vit búgva í einum vøkrum og søguríkum øki, har møguleikarnir eru óteljandi. Tað er týdningarmikið at vera við í eini spennandi vinnu, sum er í stórum vøkstri, og at marknaðarføra bygdir, støð, tiltøk og upplivingar í Eysturkommunu sum ferðavinnuøki. 

heimasíðan eitur visiteysturland, tað skrivar eysturkommuna.fo