193 hvalir á 9,2 skinn hvør, er mær sagt. Hetta gevur 1775 skinn, ella góð 133 tons av mati.
Ymiskt er sum matur kostar, men um vit brúka prísin á seyðakjøti sum grundarlag, hevur grindin sum legði beinini eitt virði í mati á einar 13 mió kr.

Man skal ikki undirmeta vísindalig kanningarúrslit. Og tey vísa at í grindini er meiri kviksilvur enn ynskiligt er.
Men innast inni haldi eg at hetta tilmælið til fólk um ikki at eta grind ella avmarkað átið mest møguligt, er bara ein hálvur sannleiki. Tí okkurt skulu vit eta.

Í staðin fyri at eta grind, eta fólk tunfisk í dósum. Minni munurin er á kviksilvrinum í grind og tunfiski.
Hvussu nógvar leivdir av pesticidum eru ikki í frukt og grønmeti sum verður innflutt? Man kann hava hetta liggjandi í mánaðir inni, uttan at hetta broytist tað allarminsta. Tað sigur seg sjálvt at hetta er viðgjørt við onkrum evnum sum eru skaðilig. Hvussu nógvar penicillin-restir munnu ikki verða í svínakjøti og høsnarungum?

Og so er tað djóravælferðin.
Í einum bakka við lørdagskyllingi er altíð eitt høsnalær sum er brotið ella hevur blóðsamlingar har tað ikki skal. Blóðsamlingar fær man ikki tá man er avlívaður. Nei, hesir verða tveittir runt og traðkaðir í pettir, alt fyri at tað skal ganga skjótt.

Ein hvalur livir sítt fría lív í havinum, áðrenn hann verður kvikliga avlívaður við nútímans amboðum á eini strond.
Vit føroyingar hava onki at skammast av at drepa og eta grind, og samanbera vit grindina við aðra keypta føði, ivist eg onga løtu í at grindin er munandi betri fyri okkum menniskju at eta.

Lat okkum pent siga takk fyri tað sum Skaparin sendir okkum, og manga takk tá etið er 

Tað skrivar løgtingamaðurin Brandur Sandoy á sínum facebook -vanga .