Vaglið súltar Ovara vøll !
Skal ein nýggj býráðssamgonga eftir valið koma afturumaftur við nýggjari játtan til alt tað, sum henda samgongan ikki megnaði, verða tað børnini og tey ungu í Gundadali, ið koma at bløða fyri tað. Tí kann eingin liva við!
Hóast fótbólturin í høvuðsstaðnum hevur alstóran tørv á at fáa vøllin aftur til bæði venjing og dyst, gongur arbeiði at skifta graslíki og betra umstøðurnar á Ovara vølli so seint, at hann við hetta lag ikki verður liðugur enn á sinni!
Tað skilst á lagnum, at fótbóltsfeløgini í Havn aftur eru hørm um, at leiðslan á Vaglinum alt annað enn raðfestir ítróttin ovarlaga í sínum politiska arbeiði. Hesaferð er tað Ovari vøllur, tað snýr seg um.
Langt um leingi er arbeiði at skifta graslíki og leggja sprinklaraskipan í vøllin farið í gongd, men tíverri verður tað ikki raðfest, so tí gongur tað øgiliga seint. Lítil manning er sett av og púrt eingin ferð á arbeiðinum, ið heldur ikki verður liðugt fyrr enn einaferð í september mánaði.
Hetta er átaluvert, tí tað ber ikki til at hava so lítla virðing fyri fótbóltinum í Havn, sum sjálvur hevur lagt orku og arbeiðismegi í tað fyrsta, sum skuldi gerast. Sjálvboðin settu feløgini gongd á arbeiðið við at taka gamla graslíkið burtur, men tá ið parturin hjá kommununi stóð fyri tørni, kom arbeiðið í drag.
Alt í hálvum gekki
Barna- og ungdómsliðini hjá HB og B36, sum eru nógv í tali, hava í løtuni bara ein vøll til taks, og hartil hava oddalið okkara í bestu deildini vánaligar umstøður, tí Ovari vøllur er ikki tøkur. Alt í lagi við tí, at vøllurin verður dagførdur, men ferð má setast á arbeiðið, so tað munar nakað. Skal tað til, so er at framskunda arbeiði og vera í gongd um kvøldarnar eisini, so tað kann fáast frá hondini sum skjótast.
Vit í Javnaðarflokkinum eru til reiðar at játta eyka pening til, so ferð kann verða sett á arbeiðið, tí vit kunnu ikki ganga við til, at keðiliga arbeiðslagið hjá “ovastu sovjettini” á Vaglinum skal ganga út yvir ungdómin og úrslitini, ið sjálvandi verða ávirkað av vánaligu umstøðunum.
Vaglið stendur fyri lappaloysnum, har einki verður gjørt liðugt. Annað dømi um tað eru ljósini í Gundadali, sum øll áttu at verið skift samstundis og ikki sum nú, at tveir steyrar verða skiftir í senn. Her er beinanvegin neyðugt við størri játtan, so Gundadalur ikki endar í hálvum gekki, og tað vilja vit fegin virka við til.
Skal ein nýggj býráðssamgonga eftir valið koma afturumaftur við nýggjari játtan til alt tað, sum henda samgongan ikki megnaði, verða tað børnini og tey ungu í Gundadali, ið koma at bløða fyri tað. Tí kann eingin liva við!
Tróndur Sigurðsson
býráðslimur
Mest lisið í farnu viku
Samband
Heygsvegur 8
490 Strendur