Tøknirisin, Google, strikaði appina, við grundgevingini, at appin mælir børnum til at roykja og til harðskap. Men hetta kenna donsku brúkararnir og Danmarks Radio ikki aftur. 

Miðlastjórin á DR, Henriette Marienlund, sigur, at tey ikki hava broytt nakað í innihaldinum. 

- Hvat, ið er orsøkin til, at appin nú er til taks aftur, vita vit ikki. Vit kunnu bara staðfesta, at vit eru á aftur, og at vit allatíð hava hildið okkum til leiðreglurnar fyri barnaundirhald.

Tá Henriette Marienlund verður spurd, um Google kann hava rætt í at strika Ramasjang-appina, sigur hon:

- Vit kunnu altíð kjakast um barnaundirhald í Danmark - tað vilja vit fegin - men hetta er ikki eitt kjak, sum vit skulu hava við Google. Eg meti, at hetta í høvuðsheitum snýr seg um, at vit hava rættin til okkara egna innihald. Google eigur bert at virka sum eitt infrakervi, men tað eru vit sum gera, av hvat fyri innihald vit vilja hava á.

Tað er annars ikki meir enn lítil vika síðan, at Youtube, sum Google eigur, valdi at steingja fyri øllum donskum tónleikatilfari á Youtube. Tilfarið liggur enn á goymsluni, men danir - og fyri so vítt eisini føroyingar - hava ikki atgongd til hetta tilfarið, sum tónleikafelagið Koda rekur. 

Hetta er tí at Koda stríðist fyri betri lønarkorum til tónleikarar og onnur, sum framleiða tilfarið. Men Youtube tekur ikki undir við krøvunum hjá Koda.