Tað hevur gingið tungliga aftur á hondina hjá fólki í Zimbabwe, serliga svørtum, líka síðan hvíta minnilutastýrið hjá Ian Smith gav teim svørtu valdið.

Men herfyri fingu læknarnir í Zimbabwe ein kvink í lønarhækking og tóku arbeiðið uppaftur eftir drúgvan steðg. Ein ríkur útiseti eigur tøkkina fyri tað.

Annars eru 16 mió íbúgvar í Zimbabwe, men 5 mió, t.e. 1/3 av fólkinum eru rýmd til grannalond í vónini at fáa arbeiði, tí í Zimbabwe táttar arbeiðsloysið í 90% millum tey ungu.

Sosialisturin Robert Mugabe mátti til himmals (ella hinvegin) fyri góðum ári síðan, og hermegin við Mnangagwe generali á odda hevur havt valdið, til val kann verða aftur. Eingin veit nær. 

Um Zimbabwe kann sigast, at tað hevur lítið og einki hjálpt meiniga fólkinum, at Mugabe varð frákoyrdir. Nýggju valdsharrarnir eru ikki smettin mætari. 

Men aftur til 4 mánaða drúgva læknaverkfallið í vetur og vár, sum kriplaði heilsutænastur landsins, fekk enda.

Maðurin, ið fær tøkkina, eitur Strive Masiyiwa, er nú telecom milliardingur, føddur í Zimbabwe, men býr í London. 

2.000 sjúkrahúslæknar fóru aftur til arbeiðis, eftir at teimum var tryggjað $ 300 (= 2.000 kr) í minstu mánaðarløn. (Ein føroyskur lækni fær 40 ferðir meiri løn um mánaðin).

Masiyiwa er nú góður fyri $ 1,1 mia (= 8 mia kr) sum stovnari og stjóri í Econet Wireless og hevur sett $ 6 mió (= 40 mió kr) í ein grunn til at gjalda læknum løn í 6 mánaðir. Trupulleikin í Zimbabwe er, at inflatiónin er nú 700% árliga, so ein føst løn minkar skjótt í keypiorku, eisini hjá einum lækna.