Beirut: Russiskur reiðari undir illgruna
Løgverjan á Kýpros hevur tosað við ein russiskan shipping-millióning, sum verður settur í sambandi við oyðileggjandi spreingingina í havnini í Beirut í farnu viku, og sum verður mett at hava tikið lívið av fleiri hundrað fólkum. 16 embætismenn í almennu libanesisku umsitingini eru handtiknir.
Tað skrivar Maritime Danmark.
Tað var farmaskipið, Rhosus, sum fyri sjey árum síðan fermdi tey 2.750 tonsini av ammoniumnitrati til havnina í Beirut, og sum týsdagin fór í luftina. Og tað var russiski shipping-millióningurin, Igor Grechushkin, ið tá stóð skrásettur sum eigari á skipinum tá.
Kanska hoyrdi hann ófatiliga ógvusliga brestin frá heimi sínum á Kýpros einar 200 kilometrar frá Beirut, har kýpriska løgverjan hevur havt hann til avhoyringar. Tað er løgverjan í Beirut, sum hevur heitt á løgverjuna á Kýpros at avhoyra russiska reiðaran.
Rhosus hevði eina rúgvu av brekum, tá skipið kom í havnina í Beirut í 2013, og havnareftirlits-myndugleikarnir hildu skipinum aftur. Seinni vildi russiski eigarin einki hava við skipið at gera. Myndugleikarnir kravdu síðani, at tey nógvu tonsini av ammoniumnitrati vórðu skipað inn í pakkhúsið, har tað lá til spreingingina í farnu viku.
Myndugleikarnir hava ongantíð lurtað eftir mongu áheitanunum um at tryggja ammoniumnitratið, so vanlukka ikki spurdist.
Mest lisið í farnu viku
Samband
Heygsvegur 8
490 Strendur