Samstundis skrivar Joe Biden søgu við Kamala Harris sum samstarvsfelaga at vinna amerikanska valið seinni í ár. Kamala Harris verður mett at hava eina blanding av eginleikum, sum skulu til, um demokratarnir skulu vinna á sitandi forsetanum, Donald Trump.
 
Bara tríggjar kvinur eru komnar so langt sum Kamala Harris nú er komin: Hillary Clinton, sum var demokratiskt forsetavalevni til seinasta val, republikanarin, Sarah Palin, sum var varaforsetavalevni, tá John McCain stillaði upp til forsetaembætið í 2008, og Geraldino Ferrarom sum var varaforsetavalevni hjá demokratunum í 1984, tá Walter Mondale var demokratiskt forsetavalevni.
 
78 ára gamli Joe Biden verður elsti amerikanski forsetin í søgu USA, um hann vinnur valið 3. november í ár. Og verður hann valdur, er alt sum bendir á, at hann bara verður sitandi í eitt valskeið.
 
Joe Biden hevur sjálvur sagt, at hansara varaforsetavalevni skal vera so væl fyri, at viðkomandi skal kunna taka við forsetaembætinum í morgin, um tað skal vera. Og nú hevur hann altso valt Kamala Harris til hetta týdningarmikla starvið – kanska serliga hesaferð, nú forsetavalevnið, Joe Biden, er komin so væl til árs.
 
Kamala Harris er ættað úr Kalifornia, og hevur sitið í Senatinum síðan 2017. Foreldur hennara eru innflytarar, og komu til USA í 1960-unum. Mamman, sum er lækni, er úr India, og pápin, sum er professari í búskaparfrøði, er upprunaliga úr Jamaica.
 
Kamala Harris er 55 ára gomul, og útbúgvin løgfrøðingur.