Tá ið amerikanski trolarin fór frá bryggju í Seattle 13. mai, fyrikom alt at vera sum vanligt. Tvær vikur seinni boðaði reiðaríið frá í tíðindaskrivi, at ein av manningini hevði fingið koronavirusið.

Dagin eftir var talið økt til 86. Tá samanum kom, vísti tað seg, at 104 av manningini vóru staðfest við koronasmittuni. Tá skal havast í huga, at øll høvdu tikið koronaroynd, áðrenn tey fóru umborð, og allar royndir vóru negativar. Kortini fingu tey hetta “blinda” ferðafólkið við á túrinum.

Óhepnað støðan hjá manningini vísir seg nú at vera ein sonn gáva hjá granskarum.

Granskarar siga, at næsta øll manningin var kannað á tveir ymiskar hættir áðrenn fráferðina. Tey vórðu kannað fyri, um tey høvdu koronavirusin júst tá, og so vórðu tey eisini kannað fyri, um tey høvdu havt virusin frammanundan.

Granskararnir komu fram til, at bara trý av manningini høvdu havt virusin frammanundan, og tey høvdu sostatt andevni í blóðinum. Hesi trý vóru millum tey fáu, sum ikki gjørdust sjúk á túrinum. Tá ið tølini síðan eru viðgjørd hagfrøðiliga, meina granskararnir, at júst hetta hevur stóran týdning.

- Hetta bendir á, at andevni í blóðinum hevur eina avgerandi ávirkan – og verjir móti SARS-CoV-2-smittuni, skriva granskararnir.

Anne Spurkland, immunologur á Universitetinum í Oslo, heldur, at amerikanski trolarin kann geva granskarum eitt ógvuliga gott høvi at fáa vissu fyri nakað, sum annars er trupult at faa váttað.

- Av ymiskum grundum kunnu vit ikki gera ávísar royndir við menniskjum, men við hesum skipinum fáa vit eina natúrliga roynd, sum kann gerast ein heppin og ógvuliga viðkomandi vitan, sigur Anne Spurkland, immunologur og professari í medisini á Universitetinum í Oslo við NRK.