Michelle Obama kallaði Trump ódugnaligan og uttan empati. Hon segði, at hvørjaferð eyguni verða vend móti Hvítu Húsunum fyri at síggja leiðaraevni og stuðul, síggja vit hurlivasa, sundurlyndi og fullkomið mangul uppá empati.

Hon legði aftrat, at amerikanski búskapurin er í upploysn orsakað av einum virusi, sum Donald Trump av øllum alvi hevur roynt at bagatelliserað.

- Amerikanarar mugu velja Joe Biden í so stórum tali, soleiðis at tað ikki kann síggjast burtur frá úrslitinum, segði hon.

Og løgfrøðingurin og fyrrverandi forsetafrúan vísti á, at Joe Biden er ein høviskur og fólkaligur maður, sum veit, hvussu tú bjargar búskapinum, hvussu tú berjir farsóttina niður og hvussu tú stjórnar USA.

Bernie Sanders vísti eisini Joe Biden sín greiða stuðul, og hann sigur komandi forsetavalið vera tað týdningarmesta í nýggjari tíð.

- Land okkara er miðskeiðis í ringastu heilsukreppuni í meira enn 100 ár. Vit uppliva størstu búskaparligu afturgongdina síðan depressjónina. Vit uppliva skipaða rasismu. Og veðurlagsbroytingar hótta alla jørðina, sum hon er, segði Bernie Sanders.

Og hann legði aftrat, at mitt í øllum hesum hava vit ein forseta, sum á ongan hátt dugir at handfara kreppuna, og sum eisini førkar seg í ein einaræðis-rætning.