Suðuroy: Heilsumiðstøðin ein týðandi tænastudepil og eitt týðandi arbeiðspláss
Í vár vóru tað 40 ár síðani at Heilsumiðstøðin í Vági, sum Vágs, Sumbiar, Porkeris og Hovs kommunur eiga, varð bygd. Og hesi 40 árini hevur Heilsumiðstøðin ment seg til at verða ein týðandi tænastudepil og eitt týðandi arbeiðspláss í Vági.
Flestum kunnugt, so halda kommunulæknarnir og tannlæknastovan hjá Rudie Thomsen til í Heilsumiðstøðini í Vági, men har eru eisini ein røð av øðrum tænastum í Heilsumiðstøðini, har fleiri enn 25 starvsfólk hava sína dagligu ella vikuligu gongd.
Á Heilsumiðstøðini í Vági eru:
Kommunulæknar, sjúkrarøktafrøðingur og læknaskrivarar
Tannlækni, tannrøktari, og klinikkassistentar.
Gigni
Økispsykiatriin
Kostráðgevi
Laborantar (blóðroyndir)
Fótarøkt
Bú- og Heimatænastan í Suðuroy (heimarøkt og sjúkrarøktafrøðingar)
Hoyrnin
Reingerðarfólk
Húsavarðatoymið
Heilsumiðstøðin hevur eisini í nógv ár hýst vevingini hjá Vágs Kvøldskúla.
Heilsumiðstøðin dagførd
Seinastu árini er farin fram ein miðvís dagføring av Heilsumiðstøðini. Stórur partur av gøtuhæddini, har m.a. viðtaluhølini hjá kommunulæknunum eru, er nýgjørd. Dagføringar eru gjørdar á 2. hædd, umframt at dagføringar eru gjørdar í kjallarahæddini. Harumframt er Heilsumiðstøðin klædd og í summar er hon eisini málað. Rýmingarleiðarnar eru eisini gjørdar av nýggjum og í næstum verður nýggj ventilatión eisini sett upp í vestara parti av Heilsumiðstøðini.
Alt í alt er talan um ein bygning í góðum standi, sum hýsur týðandi heilsutænastur til borgarar í nærumhvørvinum.
Mest lisið í farnu viku
Samband
Heygsvegur 8
490 Strendur