KÍ vann tepran 1-0 sigur á EB/Streymi í síðsta umfari og eru bert tvey stig aftanfyri oddaliðini, Víking og TB/FCS/Royn, nú ÍF kemur á vitjan við Djúpumýru.

Mikkjal Thomassen og spælararnir eru óivað uppsettir og vilja hava trý nýggj stig í dag, og um ÍF spælir, sum teir spældu í Gundadali fyri viku síðani, er lítil ivi um, at KÍ fer avstað við øllum.

Hinvegin vann ÍF 4-2 í Klaksvík í fjør, og tann dysturin spøkir kanska hjá KÍ.

Víkingur er eisini favorittur undan vitjanini hjá 07 Vestur í Sarpugerði. Eftir tveir javnleikir á rað er neyðugt hjá teimum ljósabláu at fáa trý stig til høldar, men 07 Vestur hava fingið sjey stig burturúr seinastu trimum dystunum, og fara ikki at geva heimaliðnum nakað ókeypis.

Í Havn koma suðuroyingarnir á vitjan hjá HB. TB/FCS/Royn hava tikið øll á bóli, og liggja undir liðini á Víkingi í toppinum. HB hevur ikki verið sannførandi higartil, men javna kappingin í ár ger, at frástøðan til fyrsta plássið er ikki meir enn fimm stig.

Grannauppgerð er við Løkin í Runavík, har NSÍ tekur ímóti Skála. Runavíkingarnir eru komnir í gongd, og hava vunnið tveir teir seinastu dystirnar, meðan Skála fekk sítt fyrsta mál í 1-1 javnleikinum móti 07 Vestur í sætta umfari. NSÍ hevur vunnið seinastu seks landskappingardystirnar móti Skála, og er tískil greiður favorittur.

Tað má B36 eisini sigast at vera við Margáir móti EB/Streymi, men uppgávan verður á ongan hátt løtt. Árstalsfelagið hevur framvegis nógvar skaðar at dragast við, men EB/Streymur hevur tapt tríggjar á rað, so tað verður ein strika í rokningini hjá Jákupi á Borg, um hann ikki fær trý stig við sær aftur til Havnar.

Dystirnir í 7. Umfar í Effodeildini:

HB-TB/FCS/Royn: 15.00
EB/Streymur-B36: 16.30
Víkingur-07 Vestur: 17.00
NSÍ-Skála: 17.00
KÍ-ÍF: 18.00