Herfyri fór ein mynd av tí smílandi sosialistiska diktatorinum í Venezuela, Nicolas Maduro við einum barni á vinstra armi, út um allar heimsins geilar. Smílið rakk úr oyra í oyra, og bølmennið var í tomatreyðari skjúrtu.

Venezuelski einaræðisharrin bað allar landsins kvinnur í barnsburðaraldri  fáa 6 børn, gentur sum dreingir. Hesin atheisturin sipaði enntá til Bíbliuna, har Gud biður Adam og Evu fáa avkom við hesum orðum: “Nørist, vaksið í tali, fyllið jørðina og gerið tykkum til harrar hennara....”.

Hetta er tyrannurin, ið – líkur øllum øðrum marxistum – hevur forfylgt kristnum fólki, knúst búskapin og øll familjunetverk í Venezuela, har hann hevur rátt einsamallur við eini sosialistiskari kliku í 7 ár. KvF o.o. vørp nevna hann ikki.

Maduro dittaði sær enntá í nevndu SV-sending at svara eini kvinnu í tí útvalda skaranum av luttakarum at rættvísgera síni boð til landsins kvinnur við at siga: “Hvør og ein kvinna skal hava 6 børn” og legði aftrat: “Gud signi tykkum fyri at geva landinum 6 lítlar dreingir og gentur.” 

(Mangur spyr, hvønn gud, Maduro sipar til, okkara jødisk/kristna gud ella Marx). Muslimar og marxistar siga tað, ið gagnar Allah, Marx og sær sjálvum, og teir hava eingi objektiv lívsvirði og einki mark millum sannleika og lygn.

Fólk í Venezuela eru í øðini. Spektaklið Nicolas Maduro hevur ført ein politikk, ið hevur rikið 20% av landsins íbúgvum, 5-6 mió venezuelar, til grannalondini.

Landið var hitt ríkasta í Suðuramerika við heimsins størstu oljugoymslum, til Hugo Chavez tók alt vald og varð eftir sín deyða fylgdur av Maduro. Undir hesum terroristi er búskapur, heilsu-, útbúgvingar- og almannaskipan farin í knús. Sjúkrahúsini hava hvørki heilivág ella vesipappír. Helvtin av fólkinum livur undir fátækramarkinum, og tey eru lætnað 20 pund í miðal av svongd.

Fólk eta kelidýr, dýrini í djóragørðunum og leivdir úr ruskspannum. Kina heldur búskapinum uppi við lánum. 20.000 servandir hermenn av Kuba og venezuelska hermegin halda Maduro við valdið. Landið hevur tvey ‘tjóðarting’, annað er fólkavalt uttan vald og hitt gummisteplar lógirnar hjá Maruro.

Meðan Venezuela tømist fyri fólk, biður sosialistiski diktatorurin allar landsins kvinnur um at føða 6 børn hvør. Fólk vita ikki, um tey skulu flenna ella gráta.