4 menn eru í altjóða brotsrættinum í Hague ákærdir in absentia (frástaddir) fyri at hava skotið hollendska flogfarið MH17 niður yvir Ukraina í 2014 við 298 ferðafólkum umborð, sum øll lótu lív.

3 av teim ákærdu eru russar og 1 ukraini, Igor Girkin. ICC- rætturin í Haag í Hollandi, heldur, at allir 4 drápsmenninir goyma seg í Ruslandi, sum ikki viðurkennir henda altjóða brotsmannarætt og sýtir tí at útflýggja menninar.

Niðurskjótingin er prógvað gjørd við eini jørð til luft rakett av russiska Buk-slagnum, sum ukrainskir yvirgangsmenn hava stolið ella fingið úr Ruslandi.

Nærum 20% av ukrainska fólkinum í dag eru av russiskum uppruna. Serliga Stalin, men eisini hansara kommunistisku eftirmenn fluttu við makt milliónir av ymsum fólkasløgum runt í Sovjet, tá 23 mió km2 við 330 mió íbúgvum.

Etniskir russar búgva mest í eystara Ukraina, á Donets leiðini, har nógv ráevni og ídnaður eru, sum Ukraina ikki vil av við, og Rusland vil hava. Russisku ukrainarnir hava í áravís gjørt vápnaðan uppreistur móti stýrinum í Kiew, ukrainska høvuðstaðnum.

Tað hevði helst verið lættast hjá Ukraina at fingið frið í landinum við 40 mió íbúgvum, um teir skipaðu fyri fólkaatkvøðu. So kundu eystaru landspartarnir við russiskum meiriluta verðið latnir Ruslandi. Men tað vilja ukrainar ikki.

Aftur til hollendska flogfarið, MH17. Niðurskjótingin var ein altjóða gøla, sum stjórnin hjá Putin í Moskva blankt avvísti at eiga lut í, hóast Moskva í áravís hevur latið sínum ukrainsku uppreistrarmonnum vápn og hernarhjálp.

Umborð í flogfarinum vóru 193 hollendingar, 27 australiar og 10 bretar. So hesi trý londini hava trýst hart á til at fáa ósvaraðu spurningarnar greiddar og teir seku drápsmenninir dømdar fyri sína óbótagerð.

Um dómur verður feldur í MH17 málinum er óvist. Enn meiri ivasamt er, um teir seku nakrantíð verða útflýggjaðir og revsaðir fyri sína terroratsókn.