-So er tað endaliga avgjørt, at ein nýggjur Kambur kemur í føroyska flotan síðst í oktober.
Talan er um norska frystilínuskipið Østerfjord, sum er bygdur í 1998; er 45.65 metrar langur og 10.90 metrar breiður og lastar 320 tons. Motorurin er ein B &W Alpha Diesel á 1305 hk.
Skipið hevur dragibrunn, og tí draga teir línuna upp gjøgnum skipið. Østerfjord er nokk fyrsta skipið, sum fekk dragibrunnin at rigga ordiliga,-
Tað sigur Mortan Mortensen, skipari á Kambi og sum eisini eigur í felagnum M&S á Strondum, sum eigur Kamb.

-Vit hava keypt skipið úr Norra, og tað fer at sigla til Føroyar undir norskum flaggi og verður so yvirtikið her. Okkurt smávegis skal gerast við skipið, sum t.d. skifta frystievni út, áðrenn farið verður til fiskiskap. Skipið er í góðum standi, so tað verður spennandi, - sigur Mortan.

-Núverandi Kambur verður seldur til P/F HKO í Vestmanna, sum eigur ísfiskalínuskipið Vesturhavið. Teir yvirtaka hann 17. oktober,- sigur Mortan Mortensen.

Meira verður at frætta um nýggja Kamb seinni.

Føroyska sjómansmissiónin ynskir eigarunum á Strondum og í Vestmanna til lukku og Guds signing við skipunum.

Tað skrivar Føroyska Sjómansmissiónin á facebook. Mynd: TJ-myndir.