Túsundtals fólk flýggja hvønn mánað úr sosialistiska Nicaragua
Støðan í fleiri londum í Miðamerika versnar, og Nicaragua er einki undantak. Nicaragua er bert 110.000 km2, sum Ísland til ummáls, við 6,4 mió íbúgvum.
Nú flýggja 1000-tals fólk úr Nicaragua um mánaðin undan sosialismu og harðskapi teirra ráðandi, nøkur norðureftir móti USA, tey flestu til Costa Rica, smbr ST-keldum um ringa standin í hesum miðamerikanska landi.
Vit eldru minnast Nicaragua í 1970-unum, tá korrupta Somoza-familjan ráddi. Tá áttu Somoza-fólkini $1,6 mia (= 11 mia kr), meðan fólkið svøltaði.
Ein jarðskjálvti soraði høvuðstaðin Managua sjálvan tollaksmessudag í 1972. Støðan versnaði næstu árini, so fólkið gjørdi uppreistur og valdi í 1979 kommunistin Daniel Ortega (34 ár), leiðara í Sandinistarørsluni, til forseta.
Hann legði seg dygst upp at Cuba og Sovjet ímóti ynskjunum hjá USA, ið stríddist móti Sovjet í 9 ymsum londum kring heimin í 1980-unum.
Ortega var fyrst væl fagnaður, men hann var harður kommunistur, í grønum partisanbúna, tungusnildur í sínum marxistisku røðum og við sniðgjørdum brillum fyri 1000-tals krónur. Hann var fyrimynd hjá heimsins vinstrahallu, ungum sum gomlum. Lond sendu pening, og ung vitjaðu á pílagrímsferð.
Vit kenna mynstrið aftur. Fyrst Sovjet, so Kina, Cuba, DDR, Vietnam, Chile, Kambodia, Zimbabwe, Suðurafrika og nýliga Venezuela. Men so hvørt sosialisman ikki skapti landanna íbúgvum paradís á jørð, so kólnaði eldhugin, og lovorðini tagnaðu. Tá sosialisman ístaðin fyri paradís førdi til heljar, vendu tey vinstrahallu vangan til, lótu sum einki og brígslaðu fram við líkdungunum.
Fólkið í Nicaragua hevði tol við Ortega til 1990, tá hann fall við eitt forsetaval, og borgarliga Violeta Chamorro gjørdist fyrsti kvinnuligi forseti í Latínmerika.
Í 2007 fekk Daniel Ortega valdið aftur og hevur sitið forseti síðan. Í 2018 mótmæltu fólk aftur í gøtunum, og tá vendi Ortega-juntan sosialistisku ranguna út og bardi uppreisturin niður. Síðan er støðan versnað tungliga, og nú flýggja 4.000 fólk úr Nicaragua hvønn mánað, sigur ST í tíðindum.
Í miðal ársinntøku tjena fólk bert $ 2.200 (= 15.000 kr), ið svarar til 40 kr/dag. Teirra sosialistiski leiðari, Daniel Ortega, er góður fyri $ 50 mió (= 350 mió kr).
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur