Skotland flest deyð av drøgg ovurnýtslu í framkomna heiminum
Skotland stríðist við so mangt annað enn politikk. Fíggjarmálaráðharrin, Derek Mackay verður nú rættarsøktur fyri at hava skrivað einum 16 ára gomlum, honum ókunnugum, ómyndingi 270 váðin tekstboð við eggjandi orðingum sum ‘really cute’ (‘tekkiligur’) og boðið honum til veitslu í Holyrood.
Tað rættarmálið rullar nú. Mackay kemur neyvan aftur politiskt (Guardian).
Ein gøla endaði í mars sum ein lætti fyri SNP, at Alex Salmond varð ‘not proven guilty’ fyri at hava verið ‘naskur’ við 12 kvinnur, meðan hann var 1. Ráðharri (Forsætisráðharri) í Holyrood og SNP-leiðari áðrenn Sturgeon.
Tað, ið gav Sturgeon grá hár í høvdið undir drúgva rættarmálinum ímóti Salmond, var, at hon sum floksleiðari hevði borgað yvir £ 500 tús. (= 4 mió kr) til at fíggja verjuna hjá partamanninum fyri dómstólinum í Edinburgh, eftir at flokkurin hevði kannað ‘Me-Too’ ákærurnar móti honum og fríkent hann.
Men Skotland og skotar hava stórar trupulleikar at dragast við, skrivar Sunday Times. Skotskir skúlar hava akað omaneftir í PISA o.ø. altjóða kanningum. Skotland hevur størsta tal av deyðsføllum av drøgg ovurnýtslu í framkomna heiminum. Bíðitíðin á skaðastovum í skotskum sjúkrahúsum er longsta í ES.
2 byggisáttmálar av ferjum til Cal/Mac almenna reiðaríið eru 2 ár afturut og kosta £ 100 mió (= 1,8 mia kr) meiri enn ætlað. So skotar hava tað strævið.
Skotskur politikkur líkist nakað føroyskum. Eitt nú eru 2 vinstrahallir flokkar, SNP (minnir um Tjóðveldi) við 61 tingsessum og Labour (Javnfl) við 23 MSP. Labour vil samband við London, men SNP vil loysa frá Bretlandi, serliga nú Bretland fer úr ES. London fíggjar Skotland, men fær oljuinntøku frá Skotlandi.
SNP tapti fólkaatkvøðuna um sjálvstýri fyri 5 árum síðan, men ætlar sær at rógva afturáaftur, men London-stjórnin hjá Boris Johnson noktar fyri nýggjari fólkaatkvøðu, sum bert gav 45% fyri loysing og 55% ímóti.
Neyvan hevði SNP fingið meiriluta fyri at loysa, og um ES vil hava eitt sjálvstøðugt Skotland sum lim, um SNP skuldi vunnið eina nýggja fólkaat-kvøðu. Netto hevði tað kostað ES stuðulspening, sum Skotlandi tørvar.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur