Grísarnir flúgva, áðrenn flogferðslan verður CO2-frí
Financial Times heldur lítið um tað luftiga lyftið hjá bretskum framleiðarum av flogførum og hjá flogídnaðinum, at í 2050 verður bretsk flogferðsla CO2-frí, samtíðis sum flogferðsluvinnan ætlar sær at vaksa 70% í vavi og virksemi.
“Tað fer ikki og kann ikki henda. Tað ber einfalt ikki til at fara frá kolvetni til el-rikin flogfør” heldur bretska avísin, FT, hóast Boris Johnsen í ovurhugi tekur undir við hesi høgtflúgvandi ætlan og lyfti hjá bretsku flogferðslvinnuni.
Víst hevur okkurt slag av flogfari, ið mest líkist einum ‘sveimara’ (‘glider’ á enskum) gjørt nøkur loftvegis lop. Eitt sólrikið flogfar fleyg kring knøttin, ið tók longri enn Philias Fogg í 80 dagar á sinni í bókini hjá Jules Verne.
Avísin heldur, tað fer at taka fleiri 10-ár, til ferða- ella farmaflogfør, ið viga upp í 100-tals tons sjálvi við farmi, ferðafólki og brennievni, fara at flúgva langt uttan við nú kendum og royndum brennievni.
Eitt skifti frá bensini til flogfør við vetni (brint) ella syntetiskum keroseni er líka óveruligt, tí hesi evni krevja el-orku, og tað gongur stak seint hjá grønum keldum at erstatta kolvetni. Eftir ára royndir er etanol enn bert 15% av flótandi brennievni, og øll tøk el-orka fer leingi at dríva akfør, húsahita og ídnaðin.
So langt fram, sum mannaeygað ber, so verður ikki nóg nógv el-orka til at reka flogferðslu. Alt annað er luftkastellur við teimum orkukeldum, vit kenna.
Einasti máti at fáa netto 0 útlát í flogferðslu er, at vit seta øll flogfør á jørðina og so fyrireika okkum til eitt lív uttan flogferðslu. Men hvør vil tað?
Tað høvdu hvørki vanlig fólk, og enn minni klimaterroristar latið sær lynda.
‘Sjálvt grísarnir fara á flog, áðrenn heimsins flogfør flúgva uttan útlát av kolvetni,’ endar greinin í Financial Times.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur