Kendi fuglfirðingurin Kristian Martin Petersen stillar upp til býráðsvalið í Fuglafirði 10. november.

Kristian Martin hevur ikki verið í politikki áður, hóast hann altíð hevur verið sera áhugaður í samfelagsligum viðurskiftum.

Kristian Martin Petersen er grannskoðari og hevur havt sítt egna bókhalds- og ráðgevingarvirki síðani í 2011. Hann er eisini reiðari á Sandshavinum, sum er eitt línuskip av Sandi. Somuleiðis er hann nevndarlimur og skrivari í Felagnum Línuskip, og hevur í tí sambandi mangan verið at hoyrt og talað teirra sak í fjølmiðlunum. Kristian Martin undirvísir eisini nakrar tímar um vikuna í virkisbúskapi á Miðnámi á Kambsdali.

Fuglfirðingar kenna kanska serliga Kristian Martin frá hansara virki í Thabor, har hann í mong ár hevur verið primus motor í sunnudagsskúlaarbeiðnum.

Kristian Martin hevur stór mál í ætlanum, tá hann verður valdur í Fuglafjarar býráð. Hann ætlar sær m.a. at leggja stóran dent á langtíðar býarplanlegging. Eldraøkið eigur eisini at fáa høga raðfesting, og Kristian Martin sær eisini stóra týdningin í, at kommunan, vinnan og tað privata samskifta og samstarva væl. Kommunan skal vera viðspælari – ikki mótspælari, sigur hann.

Eins og hini á lista B er Kristian Martin spentur til valið og vónar, at hann fær dyggan stuðul frá veljaranum 10. november, so hann veruliga fær gjørt mun í kommunala arbeiðinum.