Ikki bert SEV, men allar heimsins klimarørslur renna kapp við heimsins vaksandi orkutørv. “Grøn” orka nøktar enn bert 3% av allari heimsins orkunýtslu, hóast heimsins skattgjaldarar hava goldið heimsins grønu orku-framleiðarum ótaldar milliardir í studningi til ólønsom ‘varandi’ orku luftkastellir seinasta mansaldur.

Í 2015 gav Norðurlandaráðið SEV virðisløn fyri at gera Føroyar leysar av kolvetni til framleiðslu av el-orku í 2030. Síðan tá hava vit fingið vindmylnu-lundina uppi í Húsahaga. Men el-orkunýtslan í Føroyum er eisini økt so nógv, at vit enn framleiða somu 60% av el-orkuni við tungolju. Tað skal oysregna ein drúgvan vetur, til at vatn- og vindorkan saman framleiða 50% av føroysku el-orkuni.

Nú frættist, at vindmylnulundir í Suðuroy og á Eiði skulu bøta lutfallið millum grønt og svart. Men umhvørvistar eru so bims, at tey vilja hvørki góðtaka ‘varandi’ vatn ella vind, tí byrgingar minka áirnar, og vindmylnur órógva útsýnið.

Nú umhugsar SEV at kanna eina ‘sjóvindmylnulund’ upp í 120 MW t.d. eystan fyri Nólsoynna, við 10 ferðir størri framleiðsluorku enn lundin í Húsahaga (12 MW)

Mark Mills prof. á Manhattan Institute í NY skrivar, at vindorka kann í mesta lagi gagnnýta 60% av vindi sum el-orku, og bestu mylnur í dag klára enn bert 45%.

Mark Mills skrivar, at tað hevði tikið 500 ár hjá heimsins størsta framleiðara av orkubattaríum, Tesla í Nevada, at framleiða nóg nógv el-battarí til at nøkta nýtsluna hjá USA í 1 dag! M.a. tí klára øll heimsins sólpanel og vindmylnur bert 3% av øllum heimsins orkutørvi. Sostatt hevði allur heimurin steðgað upp uttan olju, gass og kjarnorku.

Henda forðing er bert ein partur av búskapinum í grønari orku. Hitt er dálking. Eitt bilbattarí vigar fleiri 100 kg og krevur 250 tons av uppgrivnum rárum metalum at framleiða. At byggja eina 100 MW vindmylnulund krevur 30.000 tons av jarnmálmi, 50.000 tons av betong og 900 tons av plastevni (ið ikki kann endurnýtast). At gera sólpanel við somu orku krevur 150% meiri tilfar. Tað er ein altjóða avbjóðing.

Heimsins ætlaða útbygging av sól- og vindorku krevur 100 til 200 ferðir meiri málm, rár metal og evni sum cobolt, lithium, dysprosium o.fl.o. úr jørðini, sum familjur við børnum í Afrika, Suðuramerika og Asia eitrast og doyggja sum flugur av, fyri at Vestheimsins væl bjargaðu úrvalslið kunnu føla seg dygdargóð og grøn.

Amnesty International ávarar ímóti hesum barnatrælahaldi og ímóti, at miljónir km² av heimsins enn órørdu náttúruøkum verða grivin upp og umhvørvið oyðilagt.