Suðuroyingarnir fingu eina frálíka byrjan upp á kappingarárið, men hava tapt tvær ferðir á rað ímóti ávíkavist NSÍ og HB. Tí vil heimaliðið, sum liggur á triðja plássi við 12 stigum, sera fegið hava øll trý stigini hesa ferð.

Tað verður kortini ikki lætt ímóti KÍ, sum liggur á fyrsta plássi saman við Víkingi. Eftir eina eitt sindur trilvandi byrjan, hava klaksvíkingarnir fingið gongd á við tveimum sigrum á rað. Dysturin við Stórá byrjar klokkan 14.30.

Víkingur skal til Fuglafjarðar at vitja grannarnar úr ÍF, sum eru í trupulleikum í løtuni. Teir reyðu hava bert fingið tvey stig burturúr seinastu fimm dystunum í Effodeildini, og umframt hetta hava bæði Jákup Mikkelsen, venjari, og Ndende Adama Gueye leikbann, tí spælarin spældi í fyrsta umfari uttan at loyvini vóru í ordan.

Víkingur hevur eisini stóran tørv á stigunum, tí oddaliðið hevur spælt javnleik tríggjar ferðir á rað. Grannauppgerðir liva ofta sítt egna lív, men teir ljósabláu mugu bera favorittheitið hesa ferð.

NSÍ tekur ímóti 07 Vestur við Løkin í Runavík, og tey flestu munnu vænta ein heimasigur. Hinvegin hevur NSÍ tvær ferðir verið greiður favorittur á heimavølli í ár, men bæði móti EB/Streymi og Skála endaði tað við javnleiki.

07 Vestur fekk eina vánaliga byrjan upp á kappingarárið, men seinastu fýra dystirnar eru átta stig fingin til høldar. Trygvi Mortensen er aftur við Løkin, og hann hevði helst einki havt ímóti at arga sínar bygdarmenn, og Ken Fagerberg í 07 Vestur álopinum kann geva øllum verjum í Føroyum trupulleikar.

Havnaliðini bæði, HB og B36, eru bæði á útivølli í dag. HB skal til Margáir, og avbjóðingin verður ivaleyst at sleppa innum EB/Streymsverjuna, sum liggur langt afturi og ikki er løtt at bróta niður.

B36 er á Skála, og avbjóðingin líkist henni hjá HB. Skála letur ikki nógv mál ígjøgnum, meðan B36 saknar skadda Lukasz Cieslewicz, sum hevur sitið á beinkinum seinastu dystirnar.

Áttanda umfar í Effodeildini:
TB/FCS/Royn-KÍ: 14.30
ÍF-Víkingur: 15.00
NSÍ-07 Vestur: 15.00
EB/Streymur-HB: 15.00
Skála-B36: 15.00