KÍ er einsamalt á odda í Effodeildini, eftir at teir sigraðu í oddabrakinum móti TB/FCS/Royn við Stórá. Klaksvíkingar vunnu 2-1, og tá Víkingur bert fekk eitt stig við sær úr Fuglafirði, eru Mikkjal Thomassen og hansara menn einsamallir á ovastu rók.

Jóannes Bjartalíð legði KÍ á odda beint áðrenn steðgin, men Jón Krosslá Poulsen javnaði við sínum fimta máli hetta kappingarárið. Albert Adu, sum í fjør spældi við TB, avgjørdi kortini dystin móti fleiri av sínum gomlu liðfeløgum, tá hann setti eitt innlegg frá Dion Splidt í netið.

Víkingur megnaði ikki at fáa trý stig í grannauppgerðini móti ÍF í Fuglafirði. Heimaliðið spældi væl í fyrra hálvleiki, og Víkingur gjørdi sær ikki dælt av støðum, sum kundu blivið farligar. Tíðliga í seinna hálvleiki legði Dánjal á Lakjuni ÍF framum, tá eitt innlegg varð skallað innfyri aftur.

Heimaliðið legði seg longur aftur á vøllin, og teir ljósabláu skaptu fleiri møguleikar. Adeshina Lawal gjørdi sær dælt av einum av hesum, tá hann við høvdinum setti eitt innleg frá Hanusi Jacobsen í málið. Víkingur royndi at avgera, og Andreas Lava Olsen misnýtti ein ótrúligan dupultkjans. Nærri komu føroyameistararnir ikki, og dysturin endaði við javnleiki.

NSÍ lat ongan iva vera um, hvar stigini skuldu enda, tá teir sendu Trygva Mortensen og 07 Vestur heim aftur við 4-0 tapi. Klæmint A. Olsen skoraði tvey tey fyrstu fyri heimaliðið, og Jens Joensen og Petur Knudsen staðfestu trygga sigurin. Vágamenninir iðra seg óivað um, at Ken Fagerberg, sum hevur nógv at siga fyri liðið, mátti skaddur av vøllinum í fyrra hávleiki.

EB/Streymur endi favorittarnar úr HB aftur til Havnar við ongum. Tóki á Lofti varð hetjan hjá sundalagsmonnunum, tá hann skoraði einsamalla málið í dystinum. HB er nú seks stig aftanfyri oddaliðið KÍ, sum kemur á vitjan í Gundadali um eina viku. EB/Streymur er nú omanfyri niðurflytingarstrikuna.

Skála hevði kanska selt dystin móti B36 fyri ein javnleik frammanundan, men teir á heimaliðnum iðra seg helst um eina stigið nú aftaná, tí teir vóru á odda tvær ferðir. Pætur Dam Jacobsen skoraði upp á brotsspark, men Róaldur Jakobsen javnaði fyri útiliðið. Brian Jacobsen skallaði heimaliðið framum eftir hornaspark, men tað eydnaðist ikki at halda fast, og B36 javnaði við máli frá Eli Falkvard Nielsen.

TB/FCS/Royn-KÍ 1-2 (0-1)
41. Jóannes Bjartalíð
65. Jón Krosslá Poulsen
77. Albert Adu

ÍF-Víkingur 1-1 (0-0)
60. Dánjal á Lakjuni
80. Adeshina Lawal

NSÍ-07 Vestur 4-0 (2-0)
09. Klæmint A. Olsen
42. Klæmint A. Olsen
55. Jens Joensen
59. Petur Knudsen

EB/Streymur-HB 1-0 (1-0)
44. Tóki á Lofti

Skála-B36 2-2 (2-1)
20. Pætur Dam Jacobsen br.
28. Róaldur Jakobsen
44. Brian Jacobsen
87. Eli Falkvard Nielsen